நாம் வாழ்ந்து கொண்டிருக்கிற இந்த பூமியை ஒரு நிமிடம் கவனித்து பார்ப்போமா? எவ்வளவு அழகாகவும், நேர்த்தியாகவும் தேவன் இந்த உலகத்தை படைத்திருக்கிறார்! மலைகள், கடல்கள், விண்மீன்கள், இயற்கையின் ஒழுங்கு—இவை அனைத்தும் தேவனுடைய மகத்துவத்தை அறிவிக்கின்றன. மனிதர்களாகிய நாமும் இந்த பூமியில் பெரிய வளர்ச்சியை அடைந்திருக்கிறோம். தொழில்நுட்ப வளர்ச்சி உலகத்தை நம் உள்ளங்கையில் கொண்டு வந்துவிட்டது. இன்று எதையும் உடனடியாக பார்க்கவும், கேட்கவும், உலகின் எந்த மூலையிலும் தொடர்பு கொள்ளவும் முடிகிறது. ஆனால் இந்த வளர்ச்சியுடன் சேர்ந்து மனிதர்களின் வாழ்க்கையில் தேவபக்தியின்மை, துன்மார்க்கம், சுயக்கட்டுப்பாடு இல்லாமை ஆகியவையும் அதிகரித்து வருகின்றன.
புதிய ஏற்பாடு நமக்கு கொடுக்கும் முக்கியமான எச்சரிப்புகளில் ஒன்று புதிய ஏற்பாடு நமக்கு கொடுக்கும் முக்கியமான எச்சரிப்புகளில் ஒன்று 2 பேதுரு 3:7: “இப்பொழுது இருக்கிற வானங்களும் பூமியும் அந்த வார்த்தையினாலேயே அக்கினிக்கு இரையாக வைக்கப்பட்டு, தேவபக்தியில்லாதவர்கள் நியாயந்தீர்க்கப்பட்டு அழிந்துபோகும் நாள்வரைக்கும் காக்கப்பட்டிருக்கிறது.”
இந்த வசனம் நம்மை நோவாவின் காலத்தை நினைக்க வைக்கிறது. அந்நாள்களில் மக்கள் தேவனை அறியாதவர்களாகவும், பாவத்தில் மூழ்கியவர்களாகவும் வாழ்ந்தார்கள். அவர்கள் எச்சரிக்கப்பட்டும் மனந்திரும்பவில்லை. அதன் முடிவில் ஜலப்பிரளயத்தினால் உலகம் அழிந்தது. அதேபோல இன்று உலகமும் தேவனை மறந்து தன் விருப்பப்படி வாழ்கிறது. நாம் பார்க்கும் இந்த பூமியும் வானமும் ஒருநாள் தேவனுடைய நியாயத்தீர்ப்பிற்காக காத்திருக்கிறது என்பதை வேதாகமம் தெளிவாக அறிவிக்கிறது. இந்த உண்மை நம்மை பயமுறுத்துவதற்காக அல்ல; விழிப்புணர்வுடன் வாழச்செய்வதற்காக. அதனால் தான் பேதுரு தொடர்ந்து சொல்லுகிறார்
“ஆகையால், பிரியமானவர்களே, இவைகள் வரக் காத்திருக்கிற நீங்கள்
கறையற்றவர்களும் பிழையில்லாதவர்களுமாய்ச் சமாதானத்தோடே
அவர் சந்நிதியில் காணப்படும்படி ஜாக்கிரதையாயிருங்கள்.”
(2 பேதுரு 3:14)
ஒரு கிறிஸ்தவரின் பாதுகாப்பு உலகத்தின் சக்தியிலும் அல்ல, தொழில்நுட்பத்திலும் அல்ல; கிறிஸ்துவின் வார்த்தைகளுக்குக் கீழ்ப்படிவதில்தான் இருக்கிறது. தேவனுடைய வார்த்தைக்கு நம்மை ஒப்புக்கொடுத்து வாழும்போது மட்டுமே வரப்போகிற நியாயத்தீர்ப்பிலிருந்து பாதுகாப்பைப் பெற முடியும்